07 juli 2016, Dialectavond op Landgoed Kotmans

Den aersten Kotmansaovend was biezonder sfeervol. Met mooie afwisselende verhalen. Zo vertellen Ria Olyslager heel boeiend aover de geschiedenis van den heiligen Donatus den bescharming mot brengen teng hagel, onweer en misoogsten. Het verhaal van Ria ging terugge naor de Romeinse tied en beschreef het laeven van Donatus zodat wi-j no een betken begriept waorumme dat e heilig verklaord is.

Dit was naor anleiding van het feit dat der op zöndag 11 juli 2016 weer ne echte processie ter ere van dissen beschermheiligen wodden ehollen in Vraogender. Dat is jaoren neet meer gebeurd, maor met name in 2010, ton noodweer zelfs den karktoren in Vraogender leet sneuvelen, wodden de bescharming van Donatus arg emist, zodat ze ‘m no toch maor weer op een vootstuk zet.

Jan te Brinke vertellen waorgebeurde verhalen oet de tied dat e nog bakker was in Miste en rond ging langs ziene klanten, maor had ok een mooi gedicht vol heimwee aover het afscheid van zien geleefde buurtschap ton e naor darp verhuusd was.

Thea Onnink droog als altied heel boeiend veur oet eur wark met prachtige, geveulige verhaaltjes, onder meer  aover de natuur en eure hoesdieren.

Het was een zeer gevarieerden aovend met een groot en  geboeid publiek. Dat deut uns al weer oetzeen naor den volgenden Kotmansaovend op 28 juli a.s.

Kijk voor de foto's in het fotoalbum