13 december 2015, Met dialect op de koffie

GROTE BELANGSTELLING BI’J “MET DIALECT OP DE KOFFIE“

Rond 150 streektaalleefhebbers wazzen zondagmorgen 13 december naor “Erve Kots” in Leevelde ekommene, umme in ne sfeervol versierde zale te luusteren naor de verhalen van ds. Hans Hinkamp en pastor Hetty Bresser.
Hans Hinkamp oet Lechtenvoorde, den ’n paar “spijbelaars” tussen ’t publiek ontdekken, vertellen ovver de B-Beukskes, dee pas gelaene oet ekommene bunt. De B-Beukskes in ’t Achterhooks bunt kleurrieke beukskes veur kindere waorin het biebelverhaal  ovver  Kasmissen, Paosen en Pinksteren op riem wordt verteld met daorbi’j spraekende tekeningen. De warkgroep Dialect en Religie hef zich drok emaakt veur disse oetgave.
Daornao vertellen Hans nog een passend kasverhaal: “Den enen” (’t zwarte schaop).

Pastor Hetty Bresser oet Genderingen vertellen in dichtvorm ovver de legende “De papklokke”. Het was een gedicht van Nel van Schalkwijk (pseudoniem van de oma van Peter Bresser). Eigenlijk was ’t gin legende, maor ’n deurverteld verhaal, want in ’t book  “Een zomervakantie bij de grenzen” (Jan Ligthart. 1e druk 1903) dat spölt in de umgeving van Genderingen wordt ok al min of meer ’t zelfde verhaal verteld.

Het was ne mooien morgen, den veur de leu nog best iets langer had möggen duren.

Kijk voor de foto's in het fotoalbum