Geschiedenis

De veurgeschiedenis van den Dialectkring.

Het begin van den Dialectkring Achterhook en Liemers lig in 1957. Het initiatief veur de oprichting ging oet van de daomaolige oudheidkundige vereniging De Graafschap. De veurzitter daorvan, mr. H.J. Steenbergen en G.J.B. Stork, redacteur bi’j de Graafschapbode, neudigen een aantal schrievers oet den Achterhook en Liemers oet op ne vergadering in Grolle en daor worden ton op 23 februari 1957 den Schrieverskring Achterhook en Liemers op ericht. Den kring begon met 15 leden, dee geregeld bi’j bi’jene kwammen um met mekare van gedachten te wisselen aover wat ze eschreven hadden.
Aerst spöllen den Schrieverskring helemaol de rolle van ‘dochter’ van de oudheidkundige vereniging De Graafschap, maor in het begin van de jaoren zestig begon ze een eigen laeven te leiden. In 1973 beslot den Schrieverskring, dat ok neet-schrievers lid konnen worden. Den Schrieverskring Achterhook en Liemers ging ton Dialectkring Achterhook en Liemers heten.
In 1966 nam de Schrieverskring het initiatief um te gaon samenwarken met de Dialektkringe Salland en Oost-Veluwe. Dissen kring had een eigen verenigingsblad, De Moespot. Zo ontstond het Verbond van Neersasse Dialectkringen (‘Het Verbond’), met De Moespot as gezamenlijk blad, dat, naost het verenigingsni’js, as veurnaamste taak had beginnende en al gevestigde schrievers de meugelijkheid tut publicatie te geven. In 1977 slot zich hier ok de Kreenk vuur de Twentse Spraok bi’j an.
In 1978 beslotten een aantal leden oet de umgeving van Lochem zich of te scheiden van onzen kring en ne zelfstandige vereniging  op te richten:Vrienden van de streektaal veur Lochem en umgeving. In datzelfde jaor worden Lochem ok lid van Het Verbond.
Onaoverbrugbaore meningsverschillen tussen de kring Twente en de dree andere kringen leiden in 2002 tut opheffing van het Verbond. De Dialectkring Achterhook en Liemers, de Dialektkringe Salland en Oost-Veluwe en de Vrienden van de streektaal Lochem e.u. gingen samen wieter onder den naam Verbond van Nedersaksische Dialectkringen (VND). Het orgaan van het Verbond bleef De Moespot.
In 1984 is de Federatie van Streektaalorganisaties in het Nedersaksisch Taalgebied (SONT) op ericht. Leden van het SONT waren praktisch alle streektaalorganisaties oet het Nedersaksische gebied, van Groningen tut en met den Achterhook. Ok den Dialectkring hef daor vanof het begin op bestuurlijk niveau in met edraeid. Het SONT kreeg het veur mekare dat in 1995 het Nedersaksisch officieel worden erkend as taal, onder deel II van het Europees Handvest veur minderheidstalen. In 2002 worden het SONT umme evormd tut ne stichting met as veurnaamste doel het verkriegen van de erkenning onder deel III van het Handvest, eenzelfde status as het Fries. Dat is tut op heden jammer genog neet elukt.
Het aantal leden, dat jaoren ongeveer stabiel bleef, is de leste jaoren geleidelijk estegen. Rond 1998 waren dat der 220, in 2007 240 en in 2013 stao-w op 290.