22 juli 2018, Streektaalfestival

STREEKTAALFESTIVAL GRENZE(N)LOOS PLAT(T) MACHTIG MOOI

900 Streektaalleefhebbers kwammen zondag 22 juli 2018 naor Erve Kots in Leevelde umme te genieten van poezië, verhalen, muziek en theater in de streektaal.
Het waer was geweldig, gelukkig was d’r völle schemme van de hoge eken dee het museumterrein al eeuwenlang "bewaakt”.
D’r wazzen zes podia, een dichterspad, beukenkraöme en de leu konnen ok nog wat aeten en drinken. De muziekoptraedens , van blaosmuziek töt rock en van luusterleedjes töt country-blues, wazzen allemaole in ’t Nedersaksisch.
De deelnemmende artiesten kwammen neet allene oet ’n Achterhook, maor ok oet ’t Duutse Münsterland, ’t  Noorden van Duutsland en oet Groningen en Drente.

In de opening van het festival gaf börgemeister Annette Bronsvoort  ( in ’t plat) an, dat het verbinden van leu ene van eure opdrachten is en dat de streektaal daorveur heel geschikt is. Ok Kreisheimatpflegerin Kristel Höing sprak in ’t plat.

Boh Foi Toch gaf an ’t ende van het festival een spetterend optreden veur een bomvol terras.
Misschien kump d’r nog vaker zo’n evenement want iederene had völle lof veur de organisatie, dee beston oet ne samenwarking van  de Stichting Achterhoek Spektakel (Rita en Hans Keuper), Dialectkring Achterhook en Liemers, Stichting Culturele Grenscontacten Achterhoek-Westmünsterland , Kulturkreis Schloss Raesfeld, Trompetenbaum und Geigenfeige en Kreisheimatpflege Borken. En natuurlijk was alles möggelijk emaakt met hulpe van heel völle vri’jwilligers en sponsoren.
Het festival was ne fantastische cultuuroetwisseling, dee ovver de grenze ging.

De foto's  kö'j bekieken in 't fotoalbum.