23 juni 2019, Dialectfestival Grenze(n)loos Plat(t)

GESLAAGD DIALECTFESTIVAL GRENZE(N)LOOS PLAT(T).

Honderden streektaalleefhebbers kwammen afgelopen zondag 23 juni naor Erve Kots in Leevelde umme daor het tweede streektaalfestival met te maken. Erve Kots, onder an ’n Leevelder Es, was ne hele mooie plaatse umme zo’n festival te hollen. ’t Was warm zunnig zommerwaer, maor d’r wazzen genog plaatsen in de schemme onder de hoge olde eken, umme te genieten van artiesten, schrievers, zangers, vertellers, dichters en toneelspöllers dee kwammen oet ’t hele Nedersaksische taalgebied.
Van Hamburg töt Münster en Bocholt en van Groningen, Drente, de Stellingwarven en Twente töt veurbi’j ’n Achterhook ko’j leu treffen.
Umme 10.30 uur begon de Big Bang Big Band oet Twente te spöllen en umme 18.00 uur was Boh Foi Toch nog tegange met eur spetterende optraeden. Veur kindere was d’r kindertheater, beukenleefhebbers konnen snuffelen tussen olde en ni’je streekbeuke en d’r was ’n klein filmtheater. Meerdere streektaalorganisatie’s van beide kanten van de grenze wazzen met ne kraom present.
De organisatie beston oet ne samenwarking van de Stichting Achterhoek Spektakel (Rita en Hans Keuper), Dialectkring Achterhook en Liemers en Stichting Culturele Grenscontacten Achterhoek-Westmünsterland.

De foto's  kö'j bekieken in 't fotoalbum