28 oktober 2023, Dialectdag

Wi-j kiekt terugge op ne gemeudeleken Dialectdag/Tag des Platt. Ca. 50 belangstellenden kwammen bi-j mekare in ’t Dormitorium te Asbeck. ’t Moch dan wal den 56e Dialectdag waezen, ’t enthousiasme is zeker neet minder ewodden met de jaoren. Dat dee de titel “Streektaal is weer in” beslist ere an.

De eerste spraekers Rita en Rudolf Averbeck uut Riesenbeck vertellen enthousiast aover de online cursus Mönsterlänner Platt dee dit jaor veur ’t eerst van start is egaone.
’t Echtpaar is eerst zo’n 20 jaor elaene begonne met ’t schrieven van ‘n woordenbook, een gigantisch wark dat ze met zien beiden in eigen beheer edaone hebt. Op basis van dat woordenbook is de online-cursus emaakt. Iederene kan daor an met doon teggen ne kleine betaling. De ontwikkeling van de cursus hebt ze zelf betaald, as particulier kö’j gin subsidie kriegen. Hulde veur zovölle passie veur de mooderspraoke. De onlinecursus besteet oet 6 onderdelen en a’j ze allemaol ehaald hebt krie’j een bewies da’j gediplomeerd platspraeker bunt. Een paar afbeeldingen van ’t Wörterbuch zit hierbi-j. Via de de link hieronder kom ie bi-j de online cursus.
https://www.dat-moensterlaenner-platt.de/

Elfriede Heitkamp oet Rhede hef datzelfde enthousiasme en zee dreg op eur eigen manaere ok bi-j an ’t behold van ’t Platt. Ze gef lessen op scholen, elk jaor weer een half jaor lang anderhalf uur in de waeke. Dat dut ze al 10 jaor. Eur verhaal is hier te laezen.

Marije Stomps hef tenslotte verteld wat Erfgoedcentrum Achterhoek en Liemers zoal dut veur onderwies veur alle laeftieden, maor met name an jonge leu en kindere dee’t van hoes oet ’t dialect neet meer met heb ekreggene. Naost de Wiesneuslessen veur kindere van 8-10 jaor is der no ok lesmateriaal ontwikkeld veur kindere van 2-6 jaor, want “Jong eleerd is old edaone”. De ni-jste beukskes en lesmaterialen wodt op woensdag 8 november a.s. epresenteerd op ’t symposium Plat veur Potwottels in Hof van Eckberge in Eibergen.
’t Veel bi-j ’t publiek op dat an Duutse kante völle van vri-jwillegers mot kommen, waor ECAL  professionele ondersteuning göf. Dat zollen zee ok wal meer willen.

Hier is een video van de presentatie van Marije

Noa de gezellige lunch hef een deel van het publiek een rondwandeling emaakt onder de zeer inspirerende begeleiding van Bernhard Laukötter, veurzitter van Heimatverein Asbeck.
Herr Laukötter kan prachtig vertellen aover de adeleke dames die wonnen in Stift Asbeck. Naodat ’t eerst een zuver nonnenklooster was wodden ’t stift in Asbeck in de 16e eeuw een vrouwenklooster en dat is ’t eblevven töt 1811 (Napoleon). De dames hadden daor een geriefelek laeven, kregen good onderwies en algemene ontwikkeling. Vake verleten ze ’t Stift weer at ze ’n good huwelek konnen sluten. In de tied dat ze in Asbeck verbleven zorgen de boern en ambachtsleu oet de umstreken veur alles wat de dames neudeg hadden. Umgekeerd wazzen de dames ok wal  royaal met giften en soms ok kredieten an ondernemmers dee anders gin bedrief konnen beginnen. De beroemdste dame van Asbeck wasTherese von Zandt dee ’n tiedlang minnaresse was van Beethoven.

Precies umme 15.00 uur was ’t ende van ne mooien, leerzamen en inspirerenden Dialectdag. Weerkommen! he’w teggen mekare ezeg.

De foto's  kö'j bekieken in 't fotoalbum