Henk Krosenbrink

Zwömbad

As jonge
neet zwömmen können,
maor toch
kort langs ’t depe lopen.
Dat geveul.

Zestig jaor later
kort langs
de deepste geveulens lopen
en neet wetten,
of i’j nog zwömmen könt.
Dat geveul.

Henk Krosenbrink

Harfst

Laot mi’j nog ene maol
den warmen wien
van owwe jonkheid drinken
en gao dan hen.
Ik zal dan zitten
bi’j ’t läöge glas
en zeen hoo olde beume
zich ontbladert.
Ne spinnekop mek dräö mi’j
tussen hand en glas
waoran de träöne dauw
straks wadert.
Vaor mi’j nog eenmaol zat
van owwen wien
en gao.
Maor kiek neet umme
hoo ik stao
en nevel um mien heufd
zich wasemt.