Derk Willem Wilterdink

Naober

Veur de leu dee dichte an de grenze wont (wonnen), nam de grenze natuurlijk ne grote plaatse in. Neet de grenze met de slagbeume en kantoorn en formeliern, dee laezene, controlaerd en bestempeld mot worden. Maor de grenze dwars deur ’n naoberschop. Dwars deur de gemeenschap van bi’j mekare wonnende leu, dee mekare heelpen bi’j geboorte en dood, en dee mekare heelpen at ze in de narigheid zatten.
Good, honderden jaorn gelaene, ton de veurolders van disse leu der ok al wonnen, hadden hoge heren beslottene, dat juust daor de grenze zol kommen tussen twee lande. Juust deur den naoberschop. De leu mosten zich maor anpassen, maor het laeven in den naoberschop worden der neet echt anders van. Ok neet ton dee hoge heren allerhande wetten en verordeningen maakten dee soms an de ene kante nogal belangriek verschilden met de andere kante. Tot in disse tied to. Ondanks Europa met alles wat der an vaste zit mot ze an de ene kante van de grenze de ale injectaeren en an de andere kante is het juust verbaone.
Och, het bunt leuke en belachelijke dinge umme der met mekare ovver te praoten op de gezamenlijke visiten. “Ho is het bi’j ow, bi’j uns is het zo…..”
Maor zee passet der zich bi’j an en helpet mekare zo good möggelijk. Ok ton der prikkeldraod tussen kwam. Most der ne ko melk worden of had men op ne andere menaere hölpe neudig, zee kwammen, al mossen ze der soms weur onder den draod hen kroepen.
Natuurlijk worden der zaken edaone ovver en waer. Goeie zaken soms. Wollen der leu stiekem de grenze ovver? Natuurlijk worden dee eholpene. Men zag in dee leu vaker een medemens in nood en as slachtoffer van de ambtenari’je en in aere ogen was het gin bandiet dee ze mosten helpen vangen. De ambtenaren mosten aer wark maor doon en de leu het aere…..
Maor altied was der den naoberschop, de naobers waor i’j altied staot op konnen maken. de gemeenschap dee altied op de aerste plaatse kwam. Men was gin Duutser of Nederlander, men was in de aerste plaatse naober!

Willem Wilterdink

Oet: ‘Naoberschop ovver de grenze’, catalogus bij de gelijknamige tentoonstelling (2003)