20 april 2018, Opening Krosenbrinkpad

Behalve een Krosenbrinkroute is d’r sinds vri’jdag 20 april 2018 ok een Henk Krosenbrinkpad in de buurtschap Miste onder Wenters. Van Ida Voerman oet Wenters was het idee, umme het naamloze pad te neumen naor Henk Krosenbrink, veur al ziene verdiensten veur de streek. Geneudigden, waoronder Erik Krosenbrink, zönne van Henk Krosenbrink, afgevaardigden van o.a. gemeente Wenters, Misters Belang, Dialectkring Achterhook en Liemers enz. enz. kwammen bi’j ’n Tappen bi’jmekare umme vandaoroet met de fietse aerste naor de ruïne  van het good Hemmink te fietsen, waor een informatiebord worden onthuld deur wetholder te Gronde.
Daornao ging ’t op ’t pad an langs ’n Brinker Es, dat pad had nog gin name. Erik Krosenbrink moch daor het informatiebord ovver het Henk Krosenbrinkpad onthullen. D’r is ok ’n ni’j zitbankjen bi’j eplaatst. Met ne kleine umweg ging ’t hele gezelschap daorna waer naor ’n Tappen. Daor wazzen een paar toespraken en kon iederene onder het genot van een hapje en een drankje nog een zetken gezellig naopraoten.
Het pad is mede möggelijk emaakt deur de samenwarking tussen Misters Belang en WCL Winterswijk.



Ruilverkaveling

Ik lepe veur ’t leste deur den olden nes
en dacht an de tied, doo’k hier jonk was ewes
en plukken de nötten, dee stonnen langs ’t paeken,
of ginge mongs zwömmen an de stöww’ in de baeke

Den nes was noo anders, daor heeng dichten mot
en ne bulldozer groof mien herin’ring kapot.
Ne stoef-eke ston op den holtwal te zwiegen.
Maor de bulldozer grommen: “Ok di’j za’k wal kriegen”.

Ik leep op de stop’le, in den mot haoste verlaorne
En bun nog ne kaere ziene wegskes egaone.
Maor achter mi’j lachen de biele in ’t holt.
Dat slaon van dee biele, ’t maken mi’j kold.

‘t Blif wal ne nes, maor ne ni’jen, ne kalen.
De wälle, unze nötten, slaot ze randverkant dale.
En al greuit der waer rogge en riept straks de aorn,
wel göf ze uns terugge, dee vergangene jaorn?

Henk Krosenbrink

Kijk voor de foto's in het fotoalbum