Verhalen en gedichten films

In 2004 is op initiatief van de Dialectkring Achterhook en Liemers en landgoodeigenaar Henk Berenschot op ’t landgood Kotmans in Miste ’n Schrieverspad an-elegd. Vanaf den tied wordt der alle jaoren mensen, deet völle edaone hebt veur ’t behold en de kunnigheid van unze streektaal, deur ’n onafhankeleke jury enomineerd veur ne boom an ’t Schrieverspad op landgood Kotmans. Den genomineerden mag ne boom naor eigen keuze planten. Dat gebeurt jaorleks in november. Anno 2018 staot der al 66 beume met biebeheurende brödjes waor de name van de planter op steet de name van den boom en ’n deur de planter emaakt of ekaozen tekst vermeld steet. Zo is der ne machtig mooien laan onstaon, ’n unieke verbinding tussen de streekcultuur en natuur.

In de maonden juli en augustus hölt de Dialectkring Achterhook en Liemers eure schrieversaovende op ’t landgood. Der wordt veur-edraegen oet wark van de streektaalschrievers. Völle publiek wet de weg inmiddels te vinden naor ’t Schrieverspad, maor deurda’w dit jaor te maken kregen met Covid19, konden disse aovende neet deurgaon. Daorumme bunt ’n antal van de bestuursleden van de Dialectkring veur de camera gaon staon op ’t landgood en daorvan könt ieleu de ankommende waeken genieten.
Wi-j van de Dialectkring Achterhook en Liemers hopt oeleu in 2021 allemaole weer te zeen op de Schrieversaovende bie landgood Kotmans in Miste.

Goodgoan,
namens ’t bestuur Dialectkring Achterhook en Liemers

15-12-2021 - 1 verhaal van Joop Lammers